بتكلمنى عن الحرية - بقلم محمد البلاط

لو على الأكل هناكل طين
وبين الناس هنعيش مساكين
بس العدل يكون فى القسمة
مش ناس راكبة وناس ماشين

بتكلمنى عن الحرية
وانت مفيش جواك ولا نية
تعطى الحق لناس اصحابه
واللى يطوله الحرامية

ناس بتجوع وتمد ايديها
وناس كثير ديون عليها
وناس تتمنى تعيش مرتاحة
وانت قللها و شبعان بيها

وبتكلمنى عن الحرية
وعيش وعدل وعيشة هنية
وانت مفيش جواك ولا نية
من ميتها كمان تسقيها

وطالب منا تبقى والدنا
وتفتش وتقلب جيبنا
واللى معانا دفاعنا وجبنا
وانت تهلب وتبيع فيها

فاكر ان رجالها دى ماتت
ولا حبالها من الايد سابت
لو راح ينسو الفول والنابت
عمر ما حد راح ينساها

لو هتجيب كلاب من بره
وتسيبها علينا بالمرة
تهبش فى القاعدين والمارة
راح نذبحا ونسلخ فيها

متفكرش الرشوة بتنفع
تصرف منها كثير وتدفع
مش هتكون فى يوم ليك مدفع
للاخوات تضرب بعضيها

واللى فى بالك وفى تفكيرك
مهما هتعمل مش هيفيدك
اخر اللعبة اللى بتلعبها
نار غضبها هتقطع ايدك

بتكلمنى عن الحرية
وانت مفيش جواك ولا نية
تعطى الحق لناس اصحابه
واللى يطوله الحرامية

بقلم محمد البلاط