كان لازم انا ابعد عنك - بقلم محمد البلاط

 كان لازم انا ابعد عنك

----------------------

علمنى الغدر وسوء ظنك
انا اكره ايام ماعرفتك
وعشان ارتاح من افعالك
كان لازم انا ابعد عنك

من القسوة تعبت كثير ياما
من بعد ما كنت انا عشمانة
راح الاقى فى قلبك حنية
وطلعت الاخر غلطانة

لا بندمى هرجع الماضى
ولا هقدر اشوفه شىء عادى
ولا عمره هيرتاح فؤادى
الا اما انسالك افعالك

وان نسى العقل ورضى قلبى
وادير من حالة لحالة
وحاولت اتناسى واخبى
القلب فيه الف علامة

علمنى الغدر وسوء ظنك
انا اكره ايام ماعرفتك
وعشان ارتاح من افعالك
كان لازم انا ابعد عنك
كان لازم انا ابعد عنك

بقلم محمد البلاط

بتحمى مين يا ابن الفقير - بقلم محمدالبلاط

 

بتحمى مين
----------

بتحمى مين يا ابن الفقير يا اكلها بالذل وعليل
لا لاقى لقمة كويسة ولا فرشة يفرشها سرير
فرحان بسلطة ومريسة على ناس غلابة متدهوسة
مش لقيا لقمتها اللى حاف و لا بالتراب متغمسة
بتحمىيها بسوق الخضار للست خدام بالنهار
رايح وجاى المدرسة مرضع وداده للصغار
وتقولى بحمى الوطن والشعب على كتفك ركن
وانت اللى بتهد العمار وانت اللى بتهد السكن
وانت اللى قاطع الطريق على الغريب والصديق
وعلى اللى تعبان وركن لعنة وحريق
بتحمى اللى مخدرك فى ساقية طور معلقك
من عز نومك اومك علشان تحمى العفن
بتحمى ولا مرتشى بتحمى مين يا ابن الفقير
يا واكلها بالذل وشقى مش عيب عليك و تختشى
ولا الكرامة بعتها بجزمة ميرى لبستها
وعشان متدفعش ثمن بلدك رخيصة خنتها
بتحمى ناس داسو بالمداس على تاريخها ومجدها
بكرة هتندم على اللى فات وتركن فى جنب من سكات
وتطلب من الله يرحمك او منها تخرج بالممات
شوف اللى قبلك من الكبار واسأل عليهم راحو فين
ولا البعيد اصلا حمار القلب اعمى و العنين
بتحمى مين يا ابن الفقير يا اكلها بالذل وشقى
بتحمى مين

بقلم محمد البلاط

هنيالك - بقلم محمد البلاط

هنيالك
-------

انا وانتا والماضى
وقصة شوق كتبنها
كانت فى الحب شىء عادى
وناس كثير سمعها
ليه جاى اليىوم تقاضى
فى قصة خلاص طوينها
وقلبك كان بيها راضى
وانا اللى رضيت انساها

من القسوة ومن هجرك
ومن ظلمك ومن بعدك
ومن رفضك ومن صدك
ومن كثر المحايلة فيك
خلاص بعتك ونسيتها
ورافضة تانى سيرتها

وجاى اليوم تقاضى
ومعتبره دا شىء عادى
وبتجدد فى شىء مهدود
ملوش وجود وفى الفاضى

منين يعود منين يعود
وانا نفسى بقيت مفقود
على الذكرى عيش ايامك
وانسى بكرة يبقالك
فى قلبى مكان من تانى
وانسانى وهنيالك
هنيالك

بقلم محمد البلاط

 

غريبة سطور قاموسى - بقلم محمد البلاط

غريبه سطور قاموسى
------------------------

غريبه سطور قاموسى
بتحكى المثاليه
وناسيه حتى احساسى
حروف من نار تأكل فيا

وألف فكرة فى راسى
ولو انطقها بالسانى
قاموسكم يحكى شىء تانى
بيحكى حكاية مش ليا
لأنثى مصنوعة من صخر
بيشغلها الذهب والمهر

انا فى الحب جنيه
قاموسها تعلمه هي
ولا راجل بيفهمها
ولا قاموس يترجمها
ونار شوقها ما تطفي
ولا من العشق تتصفى
حروفها عجزت قواميس
ما يفهمها ولا ابليس

وانا فى الحب جنيه
شباكى غزلها معقود
بريح من مسك وريح من عود
سطورها بقلم مرصود
حروفها ماس وحنيه
وبروازها سياج ورود

انا فى الحب جنيه
و تفكيرى ساكن راسى
يلملم كل حواسى
بكلمة شوق وحنيه
وكلمة حب لو بالكذب
تتوه حروفى فى عنيه
واسلم كل ما املك
وأملكك قلبى وعنيه
وجلدى يدوب كما المايه
بلمسه رقيقه ترعشنى
تنعنشنى تبرد اصابع ايديا
تقيد النار فى جسمى
يزوغ هيامى فى عنيه

واقراء كل قاموسى
بأحساسى
اتوه فى دنيتى التانيه
ومن عينى هتقرانى
ورغم انى جنيه
اعود للطابع الانسى
اعيشك وتعيش فيا
عجيب قاموسى فى قرأته
حروفه تشوفها فى عنيه
انا فى الحب جنية
وغريبة سطور قاموسى

بقلم محمد البلاط

الجمال صنع الاله - بقلم محمد البلاط

الجمال جيباه منين
-------------------
🧒 الجمال اللى فى عنيكى
وبايديكى بترسميه
كحل من مسك وعنبر
بريش طاوس بتحدديه
سجن لقلبى اللى فكر
يوم تحنى وتسجنيه
مرة ترضيه بنظرة
والف مرة تذبحيه
فى الخطاوى ليكى خطوة
وكنت ناوى اشوفلى فتوة
بالسماح امشى وراكى
اصل خلخالك ليه سطوة
الجمال جيباه منين
وكنتى فين وانا فين
العمى دا كان فى قلبى
ولا كان فى العنين
مش قادر من اللهو اخبى
ولا عارف انا فين
واللى عارفه ان قلبى
حن ليكى بميت يمين
الجمال جيباه منين

👩‍🦰 مالك انت ومال عينى
وايه اللى شاغلك بالخطاوى
مسكين وجاى فى طريقى
ولا تلميذ وهاوى

الجمال صنع الاله
لا بمال ولا بجاه
اطلب انت انه يرضى
وتنول بس رضاه

نظرتى ليك معاتبة
مش مشاغلة او موافقة
ولا كنت ناوية انى
اعمل قلبى ليك عزبة

انت تلميذ وفاضى
ولا عن فعلك دا راضى
ولا موهوم ووهمك
حسسك بالامر عادى

الجمال صنع الاله
لا بمال ولا بجاه
اطلب انت انه يرضى
وتنول بس رضاه
وتنول بس رضاه

بقلم محمد البلاط

حدد قولى نهايتك ايه - بقلم محمد البلاط

حدد قولى نهايتك ايه
--------------------

ليه بتتعبنى وتغلبني
بين ان انتا بايع او شارى
انا مش كنت اللى انتا هويها
وبتتمنى تسكن جارى

ليه اليوم منى بتتهرب
مره تغيب ومرة تقرب
ولا عاملنى ليك سليوة
وبترميها وقت ما تتعتب

ليه بتتعبنى وتغلبنى
ولما بصارحك انت بتكذب
واخد ايه من شغلت بالى
وليه بتشمت فى عزالى

شاغل قلبى وقلبك خالى
ولما بعاتبك منى بتهرب
ليه بتتعبنى وتغلبني
بين ان انتا بايع او شارى

حدد قولى نهايتك ايه
وليه بتمالط ويايا ليه
انت بايعنى ولا شارينى
ولا شىء بتلعب بيه

ليه اليوم منى بتتهرب
ومره تغيب ومرة تقرب
ولا عاملنى ليك سليوة
وبترميها وقت ما تتعتب

حدد قولى نهايتك ايه

بقلم محمد البلاط

القصاص ههيكون مهرى - بقلم محمد البلاط

القصاص هيكون مهرى
----------------------

رغم ظلمى ورغم قهرى
وقتل ابويا وكسر ظهرى
راضية بقدر الاله
والقصاص هيكون مهرى

رابعة عهد ومنسهوش
مهما قالو فيه الجحوش
اللى فاكرينها دى غابة
وهما فيها الوحوش

عارفة ابويا لسة عايش
عند الله وممتش
عهد منه ووعد الله
الشهيد حى وممتش

ريحته مسك ويا عنبر
والتاريخ عنه هيذكر
انه مرضيش بالمذلة
الا لله وكبر

رغم ظلمى ورغم قهرى
وقتل ابويا وكسر ظهرى
راضية بقدر الاله
والقصاص هيكون مهرى

بقلم محمد البلاط