الكرونا لناس وناس - بقلم محمد البلاط

الكرونا
ليها ناس
ناس وناس
وناس وناس
واللى عارف الزيتونة
يقفل الباب وخلاص
واللى مش فاهم وعايش
ركبلو جرس نحاس

الكرونا لناس وناس
للى بيصلى وصايم
واللى ليله فيه قايم
واللى يعبد ولا يسجد
يبقى يومه فى زفت عايم

واللى رقاص وفلاتى
واللى فى حفلة ليلاتى
واللى سكران وتايه
يمشى فى الزحمة وعادى

المساجد قفلوها
لجل ما يرضى الشيطان
وبلاد بيدمروها
لجل ما يفضى المكان
واللى مش فاهم وعايش
ركبوله زيل حصان

رغم تمهيد الابالسة
والدجل والكذب ياما
والخداع اصبح ممارسة
والمحاربة للعمامة

وعد من الله بكارثة
على الدجل تقوم قيامة
يظهر اللى راح يخدها
لشط فيه كل السلامة

واللى عارف الزيتونة
يقفل الباب وخلاص
واللى مش فاهم وعايش
ركبلو جرس نحاس

الكرونا لناس وناس
الكرونا لناس وناس

بقلم محمد البلاط

اكتبلى جواب وطمنى - بقلم محمد البلاط

كتبلى جواب وطمنى
---------------------

اكتبلى جواب وطمنى انك منسيتش وفاكرنى
دا انا قلبى بيتألم بعدك وتعبت بين شكى وظنى

اكتبلى جواب وطمنى غربة سرقاك ولا هجرنى
واصبر على بعدك واستناك ولا انسى العشم اللى قتلنى

عرفنى ان فى قلبك ليا لسة باقى من الحنية
وان جيت لحدك وقصدتك هتقولى فى قلبى وفى عنية

واكتبلى جواب وطمنى

انا لسة بحبك وحنينى ساكن فى القلب وفى عينى
وبتلومنى الناس على طول صبرى وعشمى بيقولى راح تجينى

انا لسة حنينى سكن فيا ودموع العين على بعدك
بايت على الخد وفى عنيه والقلب عشمان بجوارك

اكتبلى جواب وطمنى انك منسيتش وفاكرنى
دا انا قلبى بيتألم بعدك وتعبت بين شكى وظنى

اكتبلى جواب وطمنى

عرفنى ان فى قلبك ليا لسة باقى من الحنية
وان جيت لحدك وقصدت هتقولى فى قلبى وفى عنية

اكتبلى جواب وطمنى

بقلم محمد البلاط

اكتبو فى دينكم رثاء - بقلم محمد البلاط

اكتبو فى دينكم رثاء
--------------------

بين وباء وداء وماء
ابتلينا بالغباء
واللى تمتمها علينا
محبوس حتى الغناء
واللى يشكى يوم بهمه
واللى ينطقها بفمه
واللى قلمه يخط عنه
واللى يكتب فيه رثاء
كله ممنوع من الكلام
واتفرض عليه الصيام
واللى مسموح لك تخطه
اللى ما يخص العوام
مين اللى قال ان الثقافة
كلمة خاصة بالهيافة
واتنزع منها النظافة
واتحصر فيها النظام
يا بغزل يا بشكر واجب
يا تمجد فى اللى راكب
يا تشوف كل المصايب
وتقول كله تمام
مين اللى قال ان الثقافة
والادب بس احترام
مين اللى فال ان الثقافة
محصورة لربط الحزام
مين الى قال ان الثقافة
تعمى عينك عن الهيافة
والحياة تبقى كنافة
والزبيب ممنوع حرام
بين وباء وداء وماء
ابتلينا بالغباء
واللى فاهم كل حاجة
فى زمنا الاغبياء

اكتبو فى دينكم رثاء
اكتبو فى دينكم رثاء
بقلم محمد البلاط

مش معيوب يا زمان ولا عيبك - بقلم محمد البلاط

مش معيوب يا زمان ولا عيبك
----------------------------

لو سألونى عليك يا زمان
مش راح اقول اسى ولا ظالم
دا اللى ظلمنى منى وهان
دمعى عليه وحزنى وكاتم

يومك هو اليوم وطبعه
لا بيتغير ولا بيدور
شمس وقمر الليل بيتابعه
وبعد الظلمة بنلقى النور

والاوجاع بنشوفها تجينا
من احبابنا ومن اهلينا
واللى عطيه المولى وراضى
واللى بيقطع بالسكينة

مش معيوب يا زمان ولا عيبك
سيبك منهم خالص سيبك
كل الناس عيشين ايامك
ودى الاعبهم مش الاعيبك

لما تشوف غلبان مش لاقى
وناس للمال عاملة سواقى
ويتم دمعه فى عينه بيبكى
ولله بيشكى ومهش لاقى

ويومك هو اليوم وطبعه
لا بيتغير ولا بيدور
شمس وقمر الليل بيتابعه
وبعد الظلمة بنلقى النور

لو سألونى عليك يا زمان
مش راح اقول اسى ولا ظالم
دا اللى ظلمنى منى وهان
دمعى عليه وحزنى وكاتم

مش معيوب يا زمان ولا عيبك
مش معيوب يا زمان ولا عيبك

بقلم محمد البلاط

تعبنا وتعبت ايامنا - بقلم محمد البلاط

تعبنا وتعبت ايامنا
وطال الانتظار بينا
لا دق جارعلى بابنا
ولا فكر حد يجينا
وجارت علينا الايام
ما حد جيه يواسينا
وشربنا الصبر مر وخام
وجربنا ما خلينا

لحد امتى راح نصبر
وامتى من الأسى نعبر
ونوصل شط فيه راحة
يكون من اللى احنا فيه افضل
تعبنا وتعبت ايامنا
وطال الانتظار بينا
لا دق جار على بابنا
ولا فكر حد يجينا

هننسى الدنيا ننساها
وننسى ناسها وياها
ولو على الشمس ونورها
نعيش فى ظلمة وبلاها
نشوف الناس واعمالها
ونتعب نفسنا بحالها
ولو تسأل تقول مالها
كلاب مسعورة تلقها

زمن الكذب والخدعة
وماشية فيه البدعة
وعايش فيه النصاب
ومشهور وليه سمعة
وحق المظلوم لو غاب
بيشرب بالكسات عزاب
ولو راح يشكى للقاضى
بيلقى حظه دا فاضى
ومقفول فى وشه الباب

هننسى الدنيا ننساها
وننسى ناسها وياها
ولو على الشمس ونورها
نعيش فى ظلمة وبلاها
نعيش فى ظلمة وبلاها

بقلم محمد البلاط

لو قلبك كان فيه حنية - بقلم محمد البلاط

لو قلبك كان فيه حنية

-------------------

غلبنى الشوق وغلبنى
غلبنى هواك
ولا منك بتقول هتسيبنى
ولا شايفة رضاك
بين اه ولا انا محتارة
وبلف من حارة لحارة
ولا شايفة لودك دا امارة
ولا عارفة انساك

وغلبنى الشوق وغلبنى
غلبنى هواك

لو قلبك كان فيه حنية
وسالت لو مرة عليا
كان قلبى اطمن لرجوعك
ومش هشغل نفسى بموضوعك
ايه سر البعد والقسوة وايه سر قساك

مشغول بغيرنا ونسينا ؟؟؟؟
ولا انت اللى بتلعب بينا؟؟؟
وعايز تتاكد وتاكد
ان احنا اللى عليك اسينا

مش لاقى حجة تتحجج
وعلى كلمة منا بتتلكك
ان كان الود اللى مابينا
احبله عتت واتفكك

رسينا على برك رسينا
وبلاش تتعبنا وتسقينا
من مر القسوة وتشكك
فى قلوبنا وفى سر هوانا

لو قلبك كان فيه حنية

بقلم محمد البلاط

البيت معمول للذكر وبس
-----------------------

خليك فى صلاتك وعبادتك
ولسانك احفظه افضلك
البيت معمول للذكر وبس
موش للتغميز ولا ولا للمز
وان كنت صحيح انسان بتحس
احفظها لو مرة كرامتك
يا كبير السن ومقامك
موصلش لخطوة قدامك
مستكثر اقولها فى غيابك
ولا عايز بالعيبة اصدك
سيبنالكم المسجد والحتة
وبنقفل بابنا الساعة ستة
ولا جيبنا سيرتكم مع مخلوق
ولا قولنا اكلتكم العتة
انا لامم نفسى ولسانى
ولا روحت لحد ولا جانى
ولا عايز حتى تشاركونى
فى الفرح ولا حتى احزانى
ويكفينى ان انا ابعد عنكم
والسم المعقود فى لسانكم
يا ريت تخلوه فى بيوتكم
فيه ناس منه بتعانى
البيت معمول للذكر وبس
موش للتغميز ولا ولا للمز
وان كنت صحيح انسان بتحس
احفظها لو مرة كرامتك

بقلم محمد البلاط