ناس رجعت الارض لناسها
-----------------------
ناس رجعت الارض لناسها
وناس بتبيع الارض بفاسها
وناس رجعت الناس لبيتها
وناس كرشتها وقطعو نفسها
وناس في العين والنن شالتها
وناس عروها وخلعو لباسها
ناس وناس وناس وناس
فيهم القفل والترباس
وفيهم الفاهم واللى ليه راس
وفيهم ابو عقل اصله مداس
ناس كانت تعرف معنى الزوق
وامتى يثور وامتى يروق
وناس بتزم الحاكم العادل
زى ما سبو قبله فروق
داء وعادة وحبة زيادة
للرقاص يبوس بيادة
ويسجد للى بعصا بيسوقه
ولجزمته يعبدها عبادة
وكلها ناس ماس ورصاص
واللى ازاز واللى نحاس
واللى يحق عليك تدوسه
واللى تشيله فوق الراس
ناس رجعت الارض لناسها
وناس بتبيع الارض بفاسها
وناس رجعت الناس لبيتها
وناس كرشتها وقطعو نفسها
وناس في العين والنن شالتها
وناس عروها وخلعو لباسها
بقلم محمد البلاط
ليست هناك تعليقات:
إرسال تعليق