عيد العمال - بقلم محمد البلاط

عيد العمال
--------------

من امتى كان لى عيد
ولا امتى كنت سعيد
شقيان وببنيلكم
بمونة وخشب وحديد
ولا شوفت رد جميل
غير الزمن بيميل
ولحقى دا واكلين
ومعاه اهانتكم

تأمين مفيش تأمين
ولا حتى بالاسكين
وان قولت يوم تعبان
بتقطعو بسكاكين

روحت وسيبت الدار
بلف ليل ونهار
فى الغربة متغرب
من الفقر دا بهرب
اقول يا واد جرب
السعى دا مش عار
ولو مرار اشرب

بالهم دا رضينا
ومش راضى بينا
وجت لينا كرونا
مين اللى سأل فينا

لا علاج عالجونا
ولا حتى ردونا
وطمعنين فينا
وشغلو المنشار

وتقولى يومك عيد
وتعيد فيها وتزيد
فاكرينا ليه عبيد
وبتجددو اللى غار

من امتى كان لى عيد
ولا امتى كنت سعيد
شقيان وببنيلكم
بمونة وخشب وحديد

ولا شوفت رد جميل
غير الزمن بيميل
ولحقى دا واكلين
ومعاه اهانتكم

بقلم محمد البلاط