روحى يالا لمعازيمك - بقلم محمد البلاط

روحى يلا لمعازيمك
---------------------

الاب
---------
روحى يلا لمعازيمك
ولحظة هغيب واجيلك

البنت
--------
بتبكى فى فرحى ليه يابا
وطول عمرك بستناه
صحيح انا بيه فرحانه
لكن قلبى بيصرخ اااااه
صحيح سعادتى وياكم
وصدقنى مهش وياه
لكن خوفى على شرفك
حسابه يابا انا حسباه
وشايله امانة وصيناها بعهد الله
دموعك يابا جففها
ما بنتك انت عارفها
بتبكى فى فرحى ليه يابا
وطول عمرك بتستناه

الاب
---------
يا بنتى دمعة الفرحة
ياما اتمنيت اعيش لليوم
واشوفك لابسه الطرحه
فرح فطار بعد الصوم
متبكيش على بكايا
وللمعازيم قابليهم
وزيدى فى قلبى الفرحة
ودمعى هاخفيه من عينى
ويكفى دمعتى فى قلبى
وفرحك دا يعزينى

البنت
--------
يابا بالله وامانة
صحيح امى مفرقانا
وخدها الله واعطنا
روحك الحلوه تحمينا
وعشت العمر دا كله
وبجناحك محوطنا
تأمنا تدفينا
تدلع وتدادى فينا
يابا الجرح جوايا
صورة امى بشوفها فيك
فى بروزها وفى ومرايا
متألمنيش بدموعك
وعيش دلوقتى ويايا
وخف الحزن عن روحك
انا عارفاك
وعارفه كل جروحك
شايف امى فى صورتى انا
لكن بالله وامانه
مانا مفرقاك
وكل يوم والتانى
تجى تلقانى بستناك
ولو حكمت بلاها يابا جوازه
وعمرى هكمله وياك

الاب
---------
يا بنتى انا مش زعلان
واقسم لك انا فرحان
ويوم سعدى وهنايا
اشوفك لابسه الفستان
روحى يالا معازيمك
ولحظة هغيب و اجيلك
اجفف دمعى من عينى
وانا اللى يابنتي هغنيلك
روحى يلا لمعازيمك
روحى يالا لمعازيمك

بقلم محمد البلاط