صحيح فيه فى الحياة محبين
وفين ومنين
وكل اللى عينى شيفاه مصالح بس وتجارة
واوقات القى سناره وفخ منصوب لاثنين
واللى بيعطى مستنظر يرد الجميل واكثر
يا اما يكون بيتمنظر بشىء مصنوع فى الصين
وبنت تقوله بحبك وهو يقول و انا ميت
ومتعلق فى حبل الشوق علشانك ومتشعبط
وجواهم هوا بارد وحبل الشوق كمان عاتت
وبعد ايام تلاقيهم على الحامى وعلى البارد
وجواهم شيطان راقد لفرقتهم ده بيخطط
وصاحب صاحب اصحابه
على القهوة وقافل بابه
وباب الناس اعتابه
يوماتى فيها يتنطط
فى مد الايد بيه واستاذ
وللى ليه عامل كراس
تقوله محتاج ومحتاس
يقولك والله مشحط
وجار يضحك فى وش الجار
يقضى اليوم معاه فى هظار
ولو سابه وراح مشوار
يدق فى نعشه ميت مسمار
ويلعن فيه ويمرمط
صحيح فيه فى الحياة محبين
وفين ومنين
بقلم محمد البلاط
ليست هناك تعليقات:
إرسال تعليق