المكتوب هو المكتوب - بقلم محمد البلاط

مهما هتبكى وتشتكى وتحكى
مين راح يمسح بايده دمعك
كلها مالت حتى المفتى
غير دينك وسرق حلمك
ابكى واقعد اندب حظك
والطم ليل ونهار على خدك
إن مأخدتش حق بايدك
فاكر مين اللى راح يجيبلك

شوفت بعينك اللى خانوك
وقتلو بايدهم اخوك وابوك
ومصتبروش لحد ما تنسى
جابو النار وعليها شووك
مهما هتبكى وتشكى وتحكى
مش راح تلقى كبرى تعدى
عملو سياج بينك ومبينهم
وجوه الخوف سجنوك لتصدى

انزع ثوب الخوف اتحرك
عايز مين للحق يجرك
المكتوب هو المكتوب
واوعى تفكر شىء هيضرك
بس اتحرك مرة لحقك
لو مش ليك راح يبقى لابنك
ولا هتفضل عبد مطاطى
وتورث الجبن لولدك

الرجالة مش بالمنظر
ولا بالخوف من شىء يتكسر
الرجالة عزيمة وهمة
ولو باللمة يبقى هتقدر
انزع ثوب الخوف اتحرك
عايز مين للحق يجرك
المكتوب هو المكتوب
واوعى تفكر شىء هيضرك

محمد البلاط