مكانكم فين وغايبين ليه - بقلم محمد البلاط

لو الأيام هتتكلم
هتسأل فين وغايبين ليه
ومن الهجران هتتألم
وعلى اللى فات تبكى عليه

مكنش فى بالى تنسانى
ولا يبيعنى خلانى
ولا تخدنى الغربة
وملقاش نفسى فى مكانى

ما كنا وكانت الايام
تفرحنا وتجرحنا
ولو حست بأوجاعنا
تخدنا فى حضنها تانى

ايه اللى فينا اتغير
وليه الحظ مدير
وليل ونهار بندور
على احلام جوانا

وغاب الحلم ونسانا
لا لقينه ولا لقانا
وللود نحاول نوصل
عشان نوصل للقانا

وتوهنا وتاهت ايامنا
ولو تنطق هتسألنا
مكانكم فين وغايبين ليه
مكانكم فين وغايبين ليه

بقلم محمد البلاط