جتنا ايام ومعها النت - بقلم محمد البلاط

( جتنا ايام ومعها النت)
-----------------
هجرى اتنطط
وعلى الحيطة اشخبط
والعب زى زمان فى الحارة
واللى يمر انا فيه اتشعبط

وهجيب كورة معاها صفارة
واعمل جون على باب الحارة
واللى يحكم لينا ويحكم
اللى فهمها وكله شطارة
يمكن انسى الحاضر حبة
وتفكرنى بعصر محبة
وانسى الشعر الابيض فيا
ومن الاحزان ليوم اتخبى
فين ايام كانت بجمالها
راحة وجاية شايلة جمالها
ورغم الجهد وتعب القلب
كانت بتهون علينا الامها
كان فيه حب بين الناس
واللى يعاملك بالاخلاص
وكل كبير مسموع لكلامه
وبيتشال فوق على الراس
جتنا ايام ومعها النت
ومعاد حد يكلم حد
واللى يجاملك لو هيجاملك
هيشغلك حبة التت
ايام جايبة معها العار
واخدة مكان فى كل جدار
ومش معروف راجل ولا ست
ولا عادة تدارى اسرار
نفسى اغيب عنها وتغيب
وميكونليش فيها اى حبيب
وتعودلى ايام زمان
وتصيبنى فى منين ما تصيب
واجرى اتنطط
وعلى الحيطة اشخبط
والعب زى زمان فى الحارة
واللى يمر انا فيه اتشعبط
بقلم محمد البلاط