ما تلومش العايب على عيبه ( غنائى شعبى ) بقلم محمد البلاط

ما تلومش العايب على عيبه
وابعد عن مكره والاعيبه
ان كان فيه خير ما كان حظك
لا رماه عليك ولا جابه

بيمجد فيك ويتشكر
وفى قلبه منك متعكر
لو سنحت فرصة راح يسكر
ابواب الخير لو جيالك
مش كل الناس دول احبابك
ان كان فى طريقك وجيرانك
فيه منهم ناس صح تحبك
وفيه منهم اللى ما يرضى بك
وان طلع العيب منهم مره
حاول تسامحهم بالمره
واتذكر ان الله موجود
هيرد الحلوه والمره
وما تلومش العايب على عيبه
وابعد عن مكره والاعيبه
ان كان فيه خير ما كان حظك
لا رماه عليك ولا جابه
بقلم محمد البلاط