امتى يا غربة يكون فيه اوان

امتى يا غربة يكون فيه اوان
انا من البعد كثير تعبان
ده اللى حكالى ان انتى جميلة
يظهر انه ده كان سكران

امتى يا غربة تحنى علينا
يا بوداع او يوم تنسينا
ده احنا تعبنا كثير وقسينا
ايه اللى باقي لنا من الايام
زمن الحيرة
زمن الغيرة
زمن القرش بقالو كلام
امتى يا غربه تقولى سلام
اللى اتغرب قاصد مال
واللى مناه يربى عيال
واللى طفش من ظلم الظالم
جورتى عليه وصبح شيال
امتنى يا غربة يروق الحال
المعتوه قالى يا فوال
واللى عطفنا عليه فى الماضى
فاكر نفسه صبح خيال
امتى تحنى وتخلينا
بكلمة احنا استكفينا
ولا خلاص ناويه تذلينا
ببعد وحوجة ايد للمال
ابنى كبر ومفيش غير صورة
عكس يا غربة ما انا اتصورته
كان فى منايا انه هيتعلم
جورتى عليه وصبح عتال
امتى يا غربة امتى يا غربة
امتى يا غربة يكون فيه اوان
انا من البعد كثير تعبان
بقلم محمد البلاط