كانت بهية اما كان فى قلوب ولادها قناعه
وموتها بقهرها من ولدها فى ساعة
كذب فى كذب وخداع ووهم و اشاعة
..................
كانت بهيه اما كان فيه دقيق ومنخل
وغله زرع ارضها وغربال بيه تنخل
كانت بهية بمجدها بكانون حطب وفرن
وخير من ارضها كام كوم فى الجورن
وكان دلعها وفرحها بخلخال حديد مطلى
ايامها كان الشيح دوا وعلاج لبطنى
ايام ماكان اكلنا سطر وبنسيب سطر
وخير شقانا وارضنا مخزون فى داخل المطر
ايام طريقنا الترابى ورشه بالمايه
ايام ما كان فيه سمك ومصرف ليه ارضيه
ايام ماكان الشبك للرزق مش غيه
كانت خلا وكان الملك حنطور
مفيش هنا تنتظر وامتى يجيلك دور
...........................
واوعاك تقولى بهية كانت فى بوق السبع
كان سبع بيحبها مفيش كلاب ولا ضبع
ولا ديب جاء من الخلا وحاول يجرب
يهدم عليها عشها او منها يقرب
وكان راعى الغنم ملهى بعزف الناى
ولا فكر محيره ولا مشغول بالجاى
....................
كانت بهية بهية بلبسها الكستور
ايام ما كان ابنها نفسه فى لباس دمور
وكان جهاز عرسها صندوق فيه مكحله
ومرايه ممكن تكون مشطوفه ومكسره
وفوطه معطره وليفه وفلايه
وبأيدها وشغلها منديل بأويه
ويقولوا يا بختها لو كان فيه صوره
كان ده كان مهرها وحصيره ومنخل
ومطرحه مرحرحه وغربال بيه تنخل
وتشوفها يوم عرسها فرحانه بالخلخال
وكام اسوره من عظم ومطلى بالالوان
.......................
ظلموا البنيه بفكرة مش ليها
انتى الاميره اللى هي ربى يخليها
ولونوا وشها ومنكير فى ايديها
ضاعت بهية وصباها راح مع الماضى
صندوق فرحها اتكسر ومن الجهاز فاضى
.................
كانت بهية اما كان فيه فى الزمن انسان
طمع الكلاب والغجر وقسموها اكوام
قطعوا فروع الشجر وخربوا البستان
فى ركن اخر البلد بنوا قبرها فى مكان
مكتوب عليه التاريخ وبين قوسين ( كان )
كانت بهية اما كان فى قلوبنا قناعه
وموتها بقهرها من ولدها فى ساعه
كذب فى كذب وخداع ووهم و اشاعه
( كانت بهية )
بقلم محمد البلاط
ليست هناك تعليقات:
إرسال تعليق