ولاد الكلب الفاجرين
-------------------
رسوم على الموت والمولد
رسوم على المبنى والمهدود
رسوم على العابد الزاهد
وعلى المسجد والمعبود
رسوم على السكة والدكة
وعلى الفلسان والفكة
وعلى اللى نفسه يحج البيت
وفكر يدخل مكة
رسوم فى رسوم
على السالك وعلى المكتوم
وعلى اللى جاع من قلت
وعلى اللى بكيفه ناوى يصوم
رسوم على الماشى فى الشارع
والضايع والصايع
رسوم على اللى ملوش لزمة
والشاري والبايع
رسوم على الكلمة لو تتقال
وعلى الموال والسامع
رسوم على الجزمة والشبشب
وعلى المركوب وبيركب
رسوم من الظالم على المظلوم
وعلى اللى عليه بيصعب
رسوم فى رسوم
على الاصلى والمرسوم
وعلى اللى فى يوم يفكر
يفوق ويصحى من النوم
رسوم على اللى راكب مركب
وعطشان وعايز يشرب
ومد ايده فى الماية
صاحب الامر بيغضب
ويفرض كل يوم رسوم
على الفرحان والمهموم
وعلى اللى غرقان فى حزنه
وبيحاول النجى ويعوم
رسوم فى رسوم
على المساكين ليوم الدين
ومش نافعين ومش عاجبين
ولاد الكلب الفاجرين
بقلم محمد البلاط
