بتسألنى على حالى ؟؟؟؟ - بقلم محمد البلاط

بتسألنى على حالى
وانت اللى جوايا
ومنك قلبى بيعانى
وافعالى ليك مرايا

ما حستش بنار فيا
ولا بصتش فى عنيا
ولا فكرة فى يوم تسمع
ندايا او مهاتية
وجاى تسألنى عن حالى
ماصمتى كان من يأسى
ودمع عين سيال
وجاى اليوم عشان ترسى
بتسألنى على حالى
مراكبى تايهة ما بترسى
ومش شايفة لها مرسى
وقلبك من الهوى خالى
ما تسألنيش نويت ارتاح
واضمد قلبى من اللجراح
وانسى الماضى والامه
واعتبره ده شىء وراح
ما تسألنيش
بقلم محمد البلاط

فى عينك نظرة استغراب - بقلم محمد البلاط

فى عينك نظرة استغراب
ووهم خالى من الأسباب
وخوف من اتى ومقدر
وجرح جاى من احباب

هقولهالك بدون عتاب
ما تسألنيش ليه عنى ده غاب
ودبر امرك وحالك
جالك مرسال لحد الباب
ما تهتمش ولا تحزن
وسيب الامر للمالك
ولو ينادوك ما تردش
عتابهم ده صبح هالك
وعيش ايامك الحلوه
هتلقى الطريق سالك
ولو تقضيها بالغنوى
يذيد الحسن فى جمالك
بأيدك اغزل الفرحة
وعيد من الزمن ماضى
وانسى القسوة الجارحة
وبطفولتك تكون راضى
وعيشها وجدد ايامها
ومهما تكون الامها
هيبقى القلب ده فاضى
وبيها او بعدمها
هتبقى مرتاح وراضى
لا يتحكم ولا يأمر
ولا يعمل عليك قاضى
وما تهتمش ولا تحزن
وسيب الامر للمالك
ولو ينادوك ما تردش
عتابهم ده صبح هالك
بقلم ممد البلاط

ليه زرعت الشوك بينا وبينهم - بقلم محمد البلاط

ليه زرعت الشوك بينا وبينهم
مش كافى عليك مجننهم
كثرة الاعيبك وياهم
بالغدر قسيت وظالمهم

الدين مردود مردود مردود
من غير ما تحدد اى وعود
العاصى بيتجازى بذنبه
وده امر من الله علينا مفروض
انظر بعنيك كده من حولك
لا هنافقك ولا عمرى هجاملك
الغضب اللى بيحصد فينا
سببه من طوعك وعمايلك
يا مغلى النعمة اللى وهبها
رب العالمين ومسببها
ما تقولى ايه راح يفيدك
لما بأيديك منا سلبها
صدقت كلامك فى الماضى
وعليه بصمت وانا راضى
ما عرفتش غلطى اللى غلطه
الا لما حكم سيدنا القاضى
بالحكم رضيت وحنيت راسى
ولله هجدد اخلاصى
من يوم ما عرفتك وانا عاصى
وضاع الاحساس
ليه زرعت الشوك بينا وبينهم
مش كافى عليك مجننهم
كثرة الاعيبك وياهم
بالغدر قسيت وظالمهم
بقلم محمد البلاط

اياك يا مجامل تتجامل بحقوق الغير - بقلم محمد البلاط

اياك يا مجامل تتجامل
بحقوق الغير
وبلاش مع سلطان تتعامل
ولا حتى امير
وتفكر تلعب الاعيبك
وتحس ان الكون ده نصيبك
وبقيت سليمان تحكم على الطير

اياك تقلل من قيمتك
وتبيع بالمنصب لكرامتك
مكتوبلك اللى مكتوبلك
لو تبعد عنه هيوصلك
وان كان الرزق ده من حظك
احفظها وبردو هيوصلك
من غير ما تظلم ولا تذوير
اياك يا مجامل تجامل
بحقوق الغير
بقلم محمد البلاط

يا بلدنا يا اجمل رقاصة - بقلم محمد البلاط

يا بلدنا يا اجمل رقاصة يا ست الكل يا بصباصة

بتحبى اللى بينهش فيكى وبتنهى شيوخك برصاصة

على قد ما وسطك بقى ديق والكل عليه بيتريق

فيه نقطة علينا بتتفرق ما يهمش لو قالو متعاصة

اااه يا ست الكل يا كيداهم اااه يا وخده الكل على قفاهم

فاكرة لحبايبك فكراهم ولأهل الشر طرداهم

حفلاتك هز وبالمغنى ومن تابعك لابد هيغنى

ظلموكى وقالو بتستغنى عن ناس كثير وسرقاهم

ما يهمش لو قالوا عليكى لو حتى فى الطين رجليكى

بنحبك ونحب ايديكى يا ست الكل يا بصباصة

يا بلدنا يا اجمل رقاصة

بقلم محمد البلاط

على القهوة - بقلم محمد البلاط

على القهوة فيه ميت مشكلة
وقصص لناس متبهدلة
وكله بينفخ فى الهواء
من حاجه عنده ومعضلة

عاطل ومش لاقى الهوا
ومريض مفيش ثمن الدوا
وناس ايدها بتنكوى
من فحمة فوق معسلة
والقهوة ساده من الألم
وصبى لتأخيره اتشتم
علشان رزقه بيتكتم
وقابل يكون المسخرة
ومعلمين كده وكده
منظر وهيئة وبغدده
قابلين قدرهم بالرضى
الكل من الدين استوى
وناس كثير بتنتظر
لناس وهى بتتعصر
قاعدين على كرسى القلق
خايفين قلوبهم تتكسر
وقليل ناس من الفخفخه
تايهين براس مدروخة
بيتعاطو شىء ينسو النكد
وناس كيفها السروخة
على القهوة تلقى العجب
ولو سألت على السبب
تلقى البداية مشكلة
وصلت بيهم حد الغضب
على القهوة فيه ميت مشكلة
وقصص لناس متبهدلة
وكله بينفخ فى الهواء
من حاجه عنده ومعضلة
بقلم محمد البلاط

لا انا ذى ده ولا ذى ده - بقلم محمد البلاط

عايزينى مش محتاج مكان
وهى الأصول بتقول كده
ولو تطردونى وعليكم هان
لا انا ذى ده ولا ذى ده

هقبلها وامشى من سكات
وبعدى هيكون بالرضى
ومقبلش دمعة من العياط
من بهدلتكم من العدا
خايف عليكم من الندم
ومن كلاب وعربده
انا واهلى لكم خدم
ومقفلين المصيده
معقول افرط فى الوطن
واترك مناصب للرمم
او اجيب حد من الخدم
علشان يدافع عنكم
مش سهل اسيبها لو الرطم
بقع حيطانها واتهدم
اكبر ضريح لملوك زمان
وفرقوا حجارة الهرم
ولو تطردونى وعليكم هان
لا انا ذى ده ولا ذى ده
هقبلها وامشى بالرضى
بقلم محمد البلاط