قد البحور يا الم - بقلم محمد البلاط

قد البحور يا الم وبتجرى فى جروحنا
سعدك فى دمع العين وفى عزاب روحنا
قد البحور ليك موج بيغطى افراحنا
وان يوم رمنا الشوق نلقى اللى ذابحنا
حبيب وكان بالسوء ناوى على جراحنا
قد البحور يا الم وبتجرى فى جروحنا
فى العين يوم شيلناه والحب اطعمناه
نحزن فى قولته الااااااه علشان نرضى الله يمكن يفرحنا
ليه تقسى على اللى شروك وتبيع ناس حبوك
كنت لهم الضنى وكانوا ام وابوك
بالغدر والخسه وكلام كثير لسه
افضل اردد فيه بلسانك انت حكيه
والناس سمعت بيه وفيه كثير لسه
قد البحور يا الم وبتجرى فى جروحنا
حبيب وكان بالسوء ناوى على جراحنا
قد البحور يا الم وبتجرى فى جروحنا
بقلم محمد البلاط

سند السد بعود كبريت - بقلم محمد البلاط

سند السد بعود كبريت
سند السد بعود كبريت فكر عقيم وعقل عبيط
تايهه بلدنا فى شبر الماية واللى نشلها حمار بغبيط

مين مسؤل فى الحى يتابع ولاه صاحبها اصلا تابع
ماهى دولتنا بقلها صوابع تاخد الرشوه بشكل حويط
فين جسات الارض يا جاهل ولاه بنيت وانت بتتجاهل
ان النيل هيجف خلاص والمعدول راح يصبح مايل
شغل المصرى لصحبه المصرى بالفهلوه والفكر العصرى
حط النذر فى درج المكتب تبقى تمام والولد الاصلى
بلد الكذب ومشينى وامشى وعشان تمشى املالى كرشى
يا تهوينى وتبعد عنى يا تفتح العقل وترشى
وبعد الحال ما مال اتلموا جابوا الونش عشان يهتموا
المقتول بأيدك يا حكومه لسه امام الناس وبدمه
سند السد بعود كبريت
بقلم محمد البلاط

الكلام اللى كتبته - بقلم محمد البلاط

الكلام اللى كتبته
.......................
الكلام اللى كتبته بخط ايدك على الورق
لسه فكراه وحفظته ومنه قلبى اتحرق

لسه فكره قسوتك
لسه فكره ضحكتك
لسه فكره الدمع اللى اشتكيت به معاملتك
لسه فكره توسلاتى
لسه فكره كمان اهاتى
لسه فكره شهود زور
دمروا كل حبياتى
ولسه فكره الغرور
ولسه فكرالك عنادى
والنهارده جاى تشكى
وجاى تبكى ليه الساعادى ؟؟؟؟؟؟؟
تفرق ايه ساعة بكايا
هى نفس الحكايه
وجه مطبوع فى المرايا
هى نفس الساعه دى
قلبى مات ومعدش ليك
السماح كان فى ايديك
وبعناد وبقسوه منك
بعت قلبى اللى شريك
بعت دمعى وبعتنى
الدموع ما تهزنى
وان بكيت العمر كله
عمر قلبى ما ينجلى
الكلام اللى ما بينا انتهى
وفى رسايلك انت اللى كتبتها
الكلام اللى كتبته بخط ايدك على الورق
لسه فاكراه وحفظته ومنه قلبى اتحرق
بقلم محمد البلاط

مش لاقى حد يكسره - بقلم محمد البلاط

مش لاقى حد يكسره ولا حد بيقولوا اقف
بأيه ياناس تفسروا ولاه ده منكم بيتقرف
عمال يلطش فى العباد وسايقها معهم عناد
وان حد قالوا بتعمل ايه يبقى مصيره السكات

يا اما سجن ويترما يا اما يتغيب سنه
يا اما بالسوط يتجلد ويموت فى ايدهم ربما
والكل كاشش فى الجحور شبه الارانب لوتغور
من ديب دخل عشها رجاله زور
وتكلم الفحل بكلام ما تشفش غير طول اللسان
ويقولك انا المرجله وساعت الحقيه يكون مدام
هتطول كثير المهذله طول ما العقول متخضره
والجبن ساكن فى القلوب وشفاه بقفل مسكره
واللى بيقبض من الهوا مش همه ارض تتروى
ولاه مصانع تتقفل ولا ناس عايشه مدمره
كل اللى همه انه يعيش على دم حبة قراطيس
عايشين بيبكوا ويشتكوا من الفقر وبكلمة مفيش
والدور وخدها بيت لبيت والنيل نشف ومعدش غيط
بتطلع الزرع لبشر ولا للمواشى الحشيش
وكفايه نبقى من الحوش او كوم زباله او ركش
واللى هبش اهو هبش والجحش بيقولك مفيش
مش لاقى حد يكسره ولا حد يقولوا اقف
بقلم محمد البلاط

انا كنت مستنى - بقلم محمد البلاط

انا كنت مستنى
تهل يا قمرى
ولوعتى فيا
عايش ومتهنى
وانا شوقى جننى
ودمعى فى عنيه
لا سألت يوم عنى
طب حتى طمنى
بكلمة قولهالى
يمكن تصبرنى

بقلم محمد البلاط

يا ريس حقنا مهضوم - بقلم محمد البلاط

يا ريس حقنا مهضوم
.......................................
يا ريس قاضى قتلنى

لكن معرفش مين ومنين
فيه ناس كثير محاوطنى
وروحى بالجسد بتحوم
سمعت كلام مهش فينا
قاضى قتله وغير معلوم
منعرفش غير الشاره
على السياره ميزان مرسوم
يا ريس حقنا مهضوم
وقاضى العدل لى ظالم
ليه يصبح الفقير مظلوم
وشايل جواه وكاتم
من الصبح هجيب ميزان
واشيله على الكتاف كمان
وادوس على الخلق وادهسهم
ومحدش عليا يلوم
يا ريس حقنا مهضوم
يكونش القاضى ده معصوم
من الشكوى وعتاب ولوم
بنستنظر يجيلنا يوم
يكون الحق بين الخلق
بعدل الله يكون مقسوم
يا ريس حقنا مهضوم
بقلم محمد البلاط

املىء ضميرك مره بطوب - بقلم محمد البلاط

املىء ضميرك مره بطوب
يرفع فيه شويه المنسوب
عامل ربك بضمير خالص

يمكن يرضى عليك ويتوب
قلبك جب وجف حنانه
وحل مكانه كثير ذنوب
ليه بتخوض فى اعراض الخلق
ليه فى السب اسرع من البرق
تشهد زور و تلبس تهمه
فيها كلام من غرب وشرق
ليه صنبور السم لسانك
ولاه كيانك مصنوع غم
اطوى لجامك لم حصانك
صونه يصونك بيه اهتم
و امليء ضميرك مره بطوب
يرفع فيه شويه المنسوب
قلبك جب وجف حنانه
وحل مكانه كثير ذنوب
يمكن يرضى عليك ويتوب
بقلم محمد البلاط