- على قبرى تبقى تمر
هتفتكرنى يا صحبى ولا هتنسانى
بعد ما فاتنى اللى ليا وبقيت وحدانى
هتعيش وفى ليا تفتكر العشرة
نسيونى فى حياتى ايه انتظر منهم
من بعد مماتى يكتر لهم خيرهم
اعمامى واخواتى واهلى وخلانى
وكأنى قاتلهم وكأن انا جانى
انتا الباقى ليا وصديق طفولة
عشناها بحلاها ومرارها واسها
معقول تنساها وتنسانى وياها
ولا هتحفظها وتبقى العشرة
يا صحبى وصية ووصيتى واجبة
لو صح فى النية باقيلى محبة
على قبرى تبقى تمر وتقراء الفاتحة
جايز يكون فيها سر و باب السما فتحة
وتطلبلى الرحمة والعفو من ربى
على قد حبك لى ومقدارك فى قلبى
هتفتكرنى يا صحبى ولا هتنسانى
بعد ما فاتنى اللى ليا وبقيت وحدانى
على قبرى تبقى تمر
- بقلم محمد البلاط
