كنت بصور اسود فاتح - بقلم محمد البلاط

كنت بصور اسود فاتح
طلع الاسود غامق خالص
اسم مسمى وكنت انا شمة
ان القصة كبيرة ولمة
فيها المخرج اللى بيخرج
كل مسلسل وفيه فالح
ومعاه عمة النطع الرمة
واللى لبسها شعب وحارس
ويا ريت جت على وجهة بيتى
كنت سكت وقولت خلاص
قطعو يومها عيشى وقوتى
واتكسر في الوجهة ازاز
والعاملات فيهم اللى اتجرح
فى الاكتاف والعين والراس
فيهم اللى محتاجة تروح
وانا مملكش حق الجاز
على مين هعتب
ومين راح اسامح
طلع الاسود غامق خالص
اسم مسمى وكنت انا شمة
ان القصة كبيرة ولمة
فيها المخرج اللى بيخرج
كل مسلسل وفيه فالح
ومعاه عمة النطع الرمة
واللى لبسها شعب وحارس

بقلم محمد البلاط

زلزليها زلزلة - بقلم محمد البلاط

زلزليها زلزلة

---------------

مهزلة اااااه مهزلة
كل حاوى بجلجلة
بالكلاب بيحكموكى
فى الحياة توهوكى
بين جلا وجلا وجلا

لملمى جراحك وقومى
من سباتك وانهضى
اقتلى جواكى خوفك
صدى كل معتدى

اللى خانك واللى باعك
كله معروف اصمدى

انتهى زمن المزلة
ارفعى لمجدك مسلة
اكتبى العهد اللى فات
من سكات كان سببه علة

النهاردة لله عودى
طولى ليه السجود
هو صاحب الوجود
وليه وحده اعبدى

لملمى جرحك وقومى
من سباتك وانهضى

انسى كل المشاكل
للعزيمة وحدى
اعزلى كل اللى فاكر
للعدو يكون مرشد

انسى سيكس وانسى بيكو
واللى فرضينو عليكى
قوتك فى ايد شبابك
ولله وحده مجدى

مهزلة اااااه مهزلة
كل حاوى بجلجلة
بالكلاب بيحكموكى
فى الحياة توهوكى
بين جلا وجلا وجلا

مهزلة ااااه مهزلة
قومى وانسى العواطف
وزلزبيها زلزلة
زلزليها زلزلة

بقلم محمد البلاط

من نهضة انهضة يا مصرين - بقلم محمد البلاط

من نهضة لنهضة يا مصرين
خليكو مسكين فى احبال الشوق
خليكو فاكرين ان السلاطين
مجبتش تاريخ من تحت لفوق
ودليل كلامى اهو قدامى
ومنايا ادوسه باقدامى
اصل اللى عمل لينا النهضة
اكبر نصاب وحرامى
خليكو شاهدين خليكو شاهدين

اتباع تاريخنا واتوزع
وكلاب بحقه بتبرطع
وشيوخ المنصر نحتتلك
اللى اجمل منه والاجدع

من نهضة لنهضة بنتقدم
وللخلف بسرعة وللاقدم
من نهضة لنهضة يا مصرين
خليكو مسكين فى احبال الشوق
خليكو مسكين فى احبال الشوق

بقلم محمد البلاط

الكرونا لناس وناس - بقلم محمد البلاط

الكرونا
ليها ناس
ناس وناس
وناس وناس
واللى عارف الزيتونة
يقفل الباب وخلاص
واللى مش فاهم وعايش
ركبلو جرس نحاس

الكرونا لناس وناس
للى بيصلى وصايم
واللى ليله فيه قايم
واللى يعبد ولا يسجد
يبقى يومه فى زفت عايم

واللى رقاص وفلاتى
واللى فى حفلة ليلاتى
واللى سكران وتايه
يمشى فى الزحمة وعادى

المساجد قفلوها
لجل ما يرضى الشيطان
وبلاد بيدمروها
لجل ما يفضى المكان
واللى مش فاهم وعايش
ركبوله زيل حصان

رغم تمهيد الابالسة
والدجل والكذب ياما
والخداع اصبح ممارسة
والمحاربة للعمامة

وعد من الله بكارثة
على الدجل تقوم قيامة
يظهر اللى راح يخدها
لشط فيه كل السلامة

واللى عارف الزيتونة
يقفل الباب وخلاص
واللى مش فاهم وعايش
ركبلو جرس نحاس

الكرونا لناس وناس
الكرونا لناس وناس

بقلم محمد البلاط

اكتبلى جواب وطمنى - بقلم محمد البلاط

كتبلى جواب وطمنى
---------------------

اكتبلى جواب وطمنى انك منسيتش وفاكرنى
دا انا قلبى بيتألم بعدك وتعبت بين شكى وظنى

اكتبلى جواب وطمنى غربة سرقاك ولا هجرنى
واصبر على بعدك واستناك ولا انسى العشم اللى قتلنى

عرفنى ان فى قلبك ليا لسة باقى من الحنية
وان جيت لحدك وقصدتك هتقولى فى قلبى وفى عنية

واكتبلى جواب وطمنى

انا لسة بحبك وحنينى ساكن فى القلب وفى عينى
وبتلومنى الناس على طول صبرى وعشمى بيقولى راح تجينى

انا لسة حنينى سكن فيا ودموع العين على بعدك
بايت على الخد وفى عنيه والقلب عشمان بجوارك

اكتبلى جواب وطمنى انك منسيتش وفاكرنى
دا انا قلبى بيتألم بعدك وتعبت بين شكى وظنى

اكتبلى جواب وطمنى

عرفنى ان فى قلبك ليا لسة باقى من الحنية
وان جيت لحدك وقصدت هتقولى فى قلبى وفى عنية

اكتبلى جواب وطمنى

بقلم محمد البلاط

اكتبو فى دينكم رثاء - بقلم محمد البلاط

اكتبو فى دينكم رثاء
--------------------

بين وباء وداء وماء
ابتلينا بالغباء
واللى تمتمها علينا
محبوس حتى الغناء
واللى يشكى يوم بهمه
واللى ينطقها بفمه
واللى قلمه يخط عنه
واللى يكتب فيه رثاء
كله ممنوع من الكلام
واتفرض عليه الصيام
واللى مسموح لك تخطه
اللى ما يخص العوام
مين اللى قال ان الثقافة
كلمة خاصة بالهيافة
واتنزع منها النظافة
واتحصر فيها النظام
يا بغزل يا بشكر واجب
يا تمجد فى اللى راكب
يا تشوف كل المصايب
وتقول كله تمام
مين اللى قال ان الثقافة
والادب بس احترام
مين اللى فال ان الثقافة
محصورة لربط الحزام
مين الى قال ان الثقافة
تعمى عينك عن الهيافة
والحياة تبقى كنافة
والزبيب ممنوع حرام
بين وباء وداء وماء
ابتلينا بالغباء
واللى فاهم كل حاجة
فى زمنا الاغبياء

اكتبو فى دينكم رثاء
اكتبو فى دينكم رثاء
بقلم محمد البلاط

مش معيوب يا زمان ولا عيبك - بقلم محمد البلاط

مش معيوب يا زمان ولا عيبك
----------------------------

لو سألونى عليك يا زمان
مش راح اقول اسى ولا ظالم
دا اللى ظلمنى منى وهان
دمعى عليه وحزنى وكاتم

يومك هو اليوم وطبعه
لا بيتغير ولا بيدور
شمس وقمر الليل بيتابعه
وبعد الظلمة بنلقى النور

والاوجاع بنشوفها تجينا
من احبابنا ومن اهلينا
واللى عطيه المولى وراضى
واللى بيقطع بالسكينة

مش معيوب يا زمان ولا عيبك
سيبك منهم خالص سيبك
كل الناس عيشين ايامك
ودى الاعبهم مش الاعيبك

لما تشوف غلبان مش لاقى
وناس للمال عاملة سواقى
ويتم دمعه فى عينه بيبكى
ولله بيشكى ومهش لاقى

ويومك هو اليوم وطبعه
لا بيتغير ولا بيدور
شمس وقمر الليل بيتابعه
وبعد الظلمة بنلقى النور

لو سألونى عليك يا زمان
مش راح اقول اسى ولا ظالم
دا اللى ظلمنى منى وهان
دمعى عليه وحزنى وكاتم

مش معيوب يا زمان ولا عيبك
مش معيوب يا زمان ولا عيبك

بقلم محمد البلاط