ذكرياتى ويا حبك منسهاش - بقلم محمد البلاط

ذكرياتى ويا حبك منسهاش
ياللى ضيعت حياتى وكل عمرى راح بلاش

الف جرح وجرح فيا والدموع ملية عنيا
مرة بتخاصم وتهجر ومرة متردش عليا

جاى تسألنى بملامة وتعاتبنى كثير وياما
ليه مبتسألش نفسك مين اللى بادىء بالخيانة

ذكرياتى ويا حبك منسهاش
ياللى ضيعت حياتى وكل عمرى راح بلاش

كل طيب شوفتو منى وقسيت كثير لكنى
قولت اصبر على اللى منى وفيك خاب كثير ظنى

ردك الهجر وخيانة وشوفت منك مية علامة
قسوة قلبك ويا غدرك ولا عدش ليك امانة

ذكرياتى ويا حبك منسهاش
ياللى ضيعت حياتى وكل عمرى راح بلاش

بقلم محمد البلاط

ايه فى الدنيا يساوى دموعك - بقلم محمد البلاط

ايه فى الدنيا يساوى دموعك
--------------------------

ايه فى الدنيا يساوى دموعك
لما تكحل عينك بيها
دا انا بالروح والقلب عشانك
سهل عليا انى افديها
دا انتا العمر وكل حياتى
وانت الماضى وانت الاتى
يبقى اذاى اشوف دموعك
وقلبى دا يهدى ويكون عادى
دا انا يالمنى ويجننى
لو هتفكر تبعد عنى
يبقى اذاى هقبلها انا منك
تبعد لحظة او تخاصمنى
سر سحرنى جوه عيونك
هعمل ايه مقدرش الومك
قلبى مطاوعك مش مطاوعنى
وعشان كده انا لازم اصونك
دا انتا العمر وكل حياتى
وانت الماضى وانت الاتى
يبقى اذاى اشوف دموعك
وقلبى دا يهدى ويكون عادى
ايه فى الدنيا يساوى دموعك
لما تكحل عينك بيها
دا انا بالروح والقلب عشانك
سهل عليا انى افديها

بقلم محمد البلاط

خلص الكلام - بقلم محمد البلاط

خلص الكلام
-------------
خلص الكلام
ولا عدش تانى نرجعه
واللى مبينا الخصام
قلبى فيه شىء بيوجعه
غدر وقسى وكلام عصا
ومفيش شىء فى موضعه
خلص الكلام
ولا عدش تانى نرجعه
لا بالمحايلة هنصفك
ولا عايزة انى اكسفك
ولا هقبل انى لما اشوفك
اعمل بانى ما اعرفك
لا عايزة جرح تطببه
ولا عايزة فرح تقربه
كل اللى عايزاه وبطلبه
تنسى اللى كان
تنسانى وانسى سكتى
وانسى مكانى ودنيتى
وبلاش تجامل دمعتى
ولا بالكلام
قلبى فيه شىء بيوجعه
ولا عدش شىء ينفعه
غير الخصام
خلص الكلام خلص الكلام
خلص الكلام

بقلم محمد البلاط

لامتى الهجر دا هيدوم - بقلم محمد البلاط

لامتى الهجر دا هيدوم
--------------------

لامتى الهجر دا هيدوم
وامتى راح يجينى النوم
لا نافع العتاب وياك
ولا بتريح المهموم
لا عنى بعيد اعيش و انساك
ولا قريب عشان القاك
وبين الشك والحيرة
مليش فى الدنيا دى سيرة
غير انى بقيت اسيرة
لا عارفة امتى راح ترجع
ولا لامتى راح استناك
وبسهر ليلى اتكلم
مع نفسى واتألم
واشكى الهجر والحرمان
لروحى بنوحى واتندم
يا ريتنى ما عرفتك يوم
دا كان قلبى من الهموم يسلم
وعينى اللى اشتكت بالدمع
بتشكى لوعتى والشمع
طفيته ووردى راميته
وفكرى شارد وياك
وبتعدى ولا تهدى
ولا بتسأل فيه ايه عندى
ولا تشاور ولا بترضى
بلحظة اكون فيها وياك
لا عنى بعيد اعيش و انساك
ولا قريب عشان القاك
لامتى الهجر دا هيدوم
وامتى راح يجينى النوم
لا نافع العتاب وياك
ولا بتريح المهموم

بقلم محمد البلاط

بعين القلب بتطلع - بقلم محمد البلاط

بعين القلب بتطلع
ادورعلى اللى ما دارى
واقول للشوق ليه بتطمع
فى ود اللى عليك غالى
بتسهر ليلك بجرحك
ناسى فرحك وبتلالى
لهو شايفك ولا سمعك
ولا بجرحك كمان دارى

دارى على الجرح واتعلم
بلاش للحب دا تسلم
ولا للحزن تستسلم
ولا لوده تكون هاوى
بعين قلبى انا شوفته
مغناوى مغناوى
واقول يا ريت ما عرفته
ومين للجرح هيداوى
لا دمع العين ولا بالنوح
ولا صبر يداوى جروح
حبيب حبيته واتخلى
وترك علة داخل الروح
واقول للشوق ليه بتطمع
فى ود اللى عليك غالى
بتسهر ليلك بجرحك
ناسى فرحك وبتلالى
بقلم محمد البلاط

معتقدش ليك صلاة - بقلم محمد البلاط

معتقدش ليك صلاة
-----------------

معتقدش ليك صلاة ولا صوم ولا زكاة
وانت شايف ظلم ظالم ورضيت ومشيت وراه
راجع النفس ولومها وابقى فكر تساومها
بين تنطق بالحقيقة او تموت وانت كتمها
رامى نفسك فى وباء وكل اعمالك رياء
تشبه اللى قال ماء وعلى الكتاف زنوب شايلها
فرحان بتسمع اغانى وناس من الجوع تعانى
وقدس كفار دنسوه ما فكرة فيه ثوانى
عابد الشيطان وبابه مقصدك حتى ثيابه
ارتضيت ترتديها وان غاب تكون مكانه
معتقدش ليك صلاة ولا صوم ولا زكاة
وانت شايف ظلم ظالم ورضيت ومشيت وراه
واكل اللحم بكلامك ليل نهار شغال لسانك
عن اللى راح واللى جيه واللى جاب ومدق بابك
عن فلانة اطلقت عن فلانة اتجوزت
على الماشى وايده فاضية واللى شايل السبت
خف عينك عن الخلايق وارحم الناس من لسانك
وبلاش للناس تضايق وانظر الاول لعيبك
وراجع النفس ولومها وابقى فكر تساومها
بين تنطق بالحقيقة او تموت وانت كتمها
معتقدش ليك صلاة ولا صوم ولا زكاة
وانت شايف ظلم ظالم ورضيت ومشيت وراه

بقلم محمد البلاط

حوار بين الراشى والمرتشى والوسيط بينهم - بقلم محمد البلاط

الموظف
انا مش فاضى ليك دلوقتى
روح وتعالى بعد يومين
واختم ورقك وانت معدى
وجبلى ضمانة من اثنين
انت شايفنى وشايف حالى
لسه هجهز لسة فطارى
وابقى اشوف الشغل البايت
ولا عايزنى اخده لدارى
=====
المواطن
انا مقصدش يا عم اضايقك
وارحم سنى بقى من فضلك
بص فى ورقى وخلص طلبى
مانا من شهر رايح جايلك
لا بتهدينى ولا تخلصنى
لما البرد يا ولدى قرصنى
وصاحب الملك تعب ويايا
ومن الدكان جيه وكرشنى
=====
الموظف
يعنى عايزنى اعمل ايه
المطلوب انا قولت عليه
ولا غلاسة منك يعنى
اللى اقولو اردد فيه
قولت ضمانة واختم ورقك
وريح امى بقى من فضلك
انت تعبنى معاك بجهلك
روح للساعى هناك وراضيه
====
المواطن
عم يا ساعى خدنى معاك
ولا اروح واستناك
لو فى بوفيهك فيه اوراق
والاختام لو كت وياك
خلص طلبى ومش هنساك
بفضله يا ولدى الله يرعاك
====
الساعى
بس تعالى يا عم الحج
اهدى شوية راح تتفك
اشرب شاى وهدى اعصابك
وهخلاصها من غير عك
فتح مخك شخشخ جيبك
تلقى السهل يا حج نصيبك
رايح جاى وتاعب نفسك
ادفع مية هيبقى حبيبك
====
المواطن
بس يا ولدلى الرشوة حرام
====
الساعى
يبقى خلاص فى الشارع نام
====
الموظف
خلص يالا يا عم الحج
يا تخلاصنا يا اما تفك
ولا جاى تتسلى علينا
وهتخلينا فيك نشك
====
المواطن
طلبك امر يا ولدى وواجب
لو همشيها مش هرجع راكب
اللى فى جيبى حلال عليك
والغلطان انا والعايب
بس اروح بيها مخلص
نفسى يا ولدى بقى اتنفس
وللدكان ارجع استرزق
واكل حاف مش عايز اغمس
====
الموظف
المطلوب يا حج خلاص
عملت اللازم وباخلاص
واللى يجيلك فى دكانك
اخرم عينه لو برصاص
ومتزعلش يا حج علينا
راتب هايف ما مكفينا
واللى حكومتك منك تخده
يبقى حلال يا حج علينا
=====
المواطن
بس يا ولدى الرشوة حرام
وان مراشيتش يضيع دكان
والله احترت معاك يا زمان
ياللى الصالح ضايع فيك
والمرتشى عايش سلطان

بقلم محمد البلاط