اللى سلم ليك حياته - بقلم محمد البلاط

اللى سلم ليك حياته
وملكك حقه فى ايديك
ليه بتفرح ليه فى اهاته
والفرح باين عليك

وعينيك بتقول كلام
فيه شماته وخصام
معتقد انك ملكته
وفى ايدك انت الزمام

الطاعة للى يحب
والمعزة للمحب
واللى يشمت فى اللى حبه
يبقى كلب ابن كلب

اللى سلم ليك حياته
وملكك حقه فى ايديك
ليه بتفرح ليه فى اهاته
والفرح باين عليك

خاين الاحاسيس وواطى
والندالة فيك عادى
تكره اللى اللى حبك
وتحب الاعادى

خاين الطبع وخسة
ولسة هنشوف ياماا لسة
من اللى باع شرفه وعرضه
والهدوم اللى لبسها

استخبى استخبى
لسه باقى ليك حبة
دا الحكاية لسة شابة
وباقى ايام تعيشها

ولما يجي الدور عليك
وتتقطع منك اديك
تعرف ايه الفرق بينهم
الندلة والمحبة

واللى سلم ليك حياته
وملكك حقه فى ايديك
ليه بتفرح ليه فى اهاته
والفرح باين عليك

بقلم محمد البلاط

سكتك غير سكتى - بقلم محمد البلاط

وهم عشق اتوهمتو

من اللى معسول فى الكلام

وهم اخلاص انا شيلتو

وحاولت انسى الخصام

وافتكرت انك حنين

وبايدك ماسك لجام

صعب حبة وحبة لين

بالادب والاحترام

واكتشفت بانى عشقى

وهم لكن وهم خام

ضاعت الاحلام منى

وخاب فى اللى بحبه ظنى

و اللى كان واللى كان

كنت فاكرة انك هتبقى جنتى

كنت فاكرة انك حياتى ودنيتى

كنت فاكرة انك نهاية منيتى

كنت فاكرة وكنت فاكرة

واعتقدت بانى شاطرة

والنهاردة ليك شاكرة

سكتك غير سكتى

وهم عشق اتوهمتو

بقلم محمد البلاط

من امتى كنت شارينى - بقلم محمد البلاط

من امتى كنت شارينى
علشان تعزينى
فى قلبى اللى مات مجروح
من غدر محبينى
سيبنى لونيسى النوح
ويا دموع عينى
من امتى كنت شارينى
ياما حيلت فيك
ترجعلى من تانى
وبالحسنى كنت اداديك
علشان متنسانى
اتريك بيحلى ليك
عزابى وهجرانى
من امتى كنت شارينى
علشان تعزينى
سيبنى لونيسى النوح
ويا دموع عينى
سيبنى لونيسى النوح
ويا دموع عينى

بقلم محمد البلاط

جاى بتسأل ايه قسانى - بقلم محمد البلاط

جاى بتسأل ايه قسانى
--------------------

جاى بتسأل ايه قسانى
وانت الظالم وانت الجانى
وانت كويت القلب بنار
نار الهجر والحرمان
ايه قسانى ايه قسانى
وانت الظالم وانت الجانى
بعت رخيص وانا كنت الشارى
وفيك دفعت السعر الغالى
جاى بتسأل ليه وتلومنى
وبتشتكى للناس ليه منى
ومفكرتش تسأل نفسك
ليه تظلمنى وليه تهجرنى
مهما تصالح وتدادى فيا
قلبى خلاص وعزمت النية
اللى جرحنى واللى ظلمنى
عمر ما تبكى عليه عنيه
بعت رخيص وانا كنت الشارى
وفيك دفعت السعر الغالى
وجاى بتسأل ايه قسانى
بعد ما قلبك فرط فيا

بقلم محمد البلاط

يا اللى هواك رماك استنى - بقلم محمد البلاط

يا اللى هواك رماك استنى
قبل متاخد ناس معاك
فاكر نفسك رايح الجنة
ومنتش عارف انه هلاك
قبل متدخل لعبة اعرفها
ومين اطرافها ومين وياك
ومتنساش ان انت ملكش
لا فى الباب ولا فى الشباك
افهم قبل ما تبتدى بيها
كيف تبدائها وكيف تنهيها
ولا فاكرها لعبة بكيفك
تشبع منها وراح ترميها
افهم معنى العركة اذاى
مش على قهوة هتشرب شاى
فيها ناس ضايعة وفيها ناس تايهة
وفيها رصاص ولكن حى
افهم ياللى ملكش فى حاجىة
اللى بيلعب فيها خواجة
وانت داخلها وكلها نار
بعقل فار كله سذاجة
يا اللى هواك رماك استنى
قبل متاخد ناس معاك
فاكر نفسك رايح الجنة
ومنتش عارف انه هلاك

بقلم محمد البلاط

اتحملنا كثير وياما - بقلم محمد البلاط

مهما تحط علينا حمولك
راح نتحمل ومش هنلومك
ومش هنقول الااااه ولا نشكى
وراح نخيب كل ظنونك
اتحملنا كثير وياما
وقسوة ناس ومن ناس ملامة
وقولنا هتيجى يوم وتعينا
اتريك جاى تزيد همومنا
ليه يا زمنا ليه بتتعبنا
وغاوى عزابنا وغاوى قسانا
حط علينا وزيد همومنا
واحنا بعون الله صابرين
ومش استنظر يوم تساعدنا
انت ساعدت قبلنا مين
حط علينا وزيد بزياده
ودى محفوظة وصبحت عادة
اللى يأمن ليك يا زمان
يبقى شربها وكانت ساده
اتحملنا كثير وياما
وقسوة ناس ومن ناس ملامة
ومهما تحط علينا حمولك
راح نتحمل ومش هنلومك
ومش هنقول الااااه ولا نشكى
وراح نخيب كل ظنونك

بقلم محمد البلاط

استنيتك عمرى بحاله - بقلم محمد البلاط

استنيتك عمرى بحاله
لا اتألمت ولا بتكلم
هونت عليك وقولت ومالو
يمكن شر هنسلم منه
يوم ورا يوم بستنظر فيك
تقسى وتظلم وانا بدداديك
لا بتجينى ولا ترسينى
ولا معرفنى فين ارضيك
واستنيتك عمرى بحاله
لا اتألمت ولا بتكلم
فاكر الهجر بيه تعزبنى
او بالمكر دا هتغلبى
لا يا حبيبى لو هتسيبنى
اتعودت خلاص عليك
مش زعلانة ولا ندمانة
لو هتغيب وراح تنسانا
وكافى علينا عرفنا بأنك
ما بتصون ابدا لامانة
استنيتك عمرى بحاله
لا اتألمت ولا بتكلم
هونت عليك وقولت ومالو
يمكن شر هنسلم منه
يوم ورا يوم بستنظر فيك
تقسى وتظلم وانا بدداديك
لا بتجينى ولا ترسينى
ولا معرفنى فين ارضيك
ولا معرفنى فين ارضيك

بقلم محمد البلاط