فتن حلت وتعبانا - بقلم محمد البلاط

متعرفش الحقيقة فين
وعينك فيك ومش شايفة
وعقلك تاه بين الاثنين
وايدك من الدليل ناشفة
زمن اصبح ليه وجهين
وناس بتسيبه مش اسفه
يا دنيا وخدانا على فين
فى ليل وعينا مش شايفة
وده بيحل ويحرم
وده بيرقى ويكرم
وملناش نصيب مع دول
ولا مع دول راح نخدم
فتن حلت وتعبانا
وهم بيجرى ورانا
وبندادى فيكى ونبكى
وجرانا ووخدانا
لمين يا دنيا راح نشكى
غير الله وليه راح نبكى
وندعيه يكشف الغمة
عن الامة ويرعانا
ونعرف الحقيقة فين
بعين بصيرة جوانا
متعرفش الحقيقة فين
وعينك فيك ومش شايفة
وعقلك تاه بين الاثنين
وايدك من الدليل ناشفة

بقلم محمد البلاط

ما بوسنا ايدك وقولنالك - بقلم محمد البلاط

ما بوسنا ايدك وقولنالك
بلاش الوهم يحلالك
ومتفتحش فى اللى اتقال
ولا تجيبو على لسانك
ما كان من السهل تنسى الناس
وتعمل مش واخد بالك
لكن للجهل فيه ليه ناس
بتطابق فى اوصافك
عارف ان انت الغلطان
وسايق فى الهبل وجنان
وبتبرر فى اعمالك
وبتعاند كمان وكمان
وتشكى المظلوم خانك
فضحت الدنيا ويا الدين
وجينا معاك فى الرجلين
طب انت لو ناوى تطفش
عيالنا بيها هنروح فين
ما بوسنا ايدك وقولنالك
بلاش الوهم يحلالك
ومتفتحش فى اللى اتقال
ولا تجيبو على لسانك
صحيح فيه ناس ويانا
بتسند لجل مصالحها
وساعت الجد هتنسانا
ولو للاهل هتبيعها
دى مركب كلنا فيها
بافعالك مضيعها
فاكر هتسيبنا جواها
وتنجى من فواق شراعها
معانا وقبلنا نغرق
وده ذنب اللى ما يفرق
ما بين الحق والباطل
حلال فى حبل ده يشنق
ما بوسنا ايدك وقولنالك
بلاش الوهم يحلالك
ومتفتحش فى اللى اتقال
ولا تجيبو على لسانك

بقلم محمد البلاط

هشتكيلك من انت - بقلم محمد البلاط

اشتكيت منك لهم
وقولت ليهم كلهم
على اللى حاصل واللى فات
واللى كان سبب البعاد
اشتكيت ايوه اشتكيت
ومن عماليك اااه بكيت
رغم انى حاولت انسى
يمكن ارتاح بالبعاد
واللى حزن قلبى منهم
قالو شىء ما يخصهم
هشتكيلك منك انت
لو فى قلبك ليا حته
قولى ايه غير فى طبعك
وهسمعك بدون معارضه
وفى النهاية اسمع كلامى
لو مش هترد النهارده
بس طمنى عشانى
لو فى قلبك لسه ليا
من الحنان باقى شوية
وللرجوع نعقدها نية
يروح خصامك وخصامى
ومشتكيش منك لهم
وهشتكيلك منك انتا
لو عيونى خصمتهم
ولو فى قلبك ليا حته
ابقى دايما جنبهم
ابقى دايما جنبهم

بقلم محمد البلاط

بنتظر منك معاد - بقلم محمد البلاط

بنتظر منك معاد
--------------

ياما بكتبلك حنينى وارسل الود فى رسايل
وانتظر انك تجينى واحاول كثير واحايل

كنت بتمنى وصالك ملهوفة بشوق لحنانك
كنت بتمنى اشوفك او اصادف يوم خيالك

اشتياقى فى غيبتك فيا ذاد بنتظر منك بمعاد
تطفى نارى ولوعتى باللقى بعد البعاد

ياللى خليت بسمتى بالدموع عملت حداد
واشتكت لمخدتى من الانين ويا السهاد

ياما بكتبلك حنينى وارسل الود فى رسايل
وانتظر انك تجينى واحاول كثير وا حايل

بنتظر منك معاد بنتظر منك معاد

بقلم محمد البلاط

اللى منى مدوخينى - بقلم محمد البلاط

ااااه يا قلبى اااااه منهم وااااه من غدر قلوبهم
اللى منى مدوخينى واللى منهم غصب عنى
شيلت فى القلب وصاينهم والكبير فيهم طعنى
ااااه يا قلبى اااااه منهم وااااه من غدر قلوبهم
اللى كنت مشتريهم بالرخيص هدرولى دمى
علشانهم بعت عمرى وبايدهم ضيعونى
وكنت ليهم مشترى وبالخيانة دول بعونى
ااااه يا قلبى اااااه منهم وااااه من غدر قلوبهم
اللى كنت مشتريهم بالرخيص هدرولى دمى
اللى منى مدوخينى واللى منهم غصب عنى
شيلت فى القلب وصاينهم والكبير فيهم طعنى
قالوا اهلك دول ومنهم يبقى عزك لو تصونهم
قولت فوق راسى وخادمهم وفى عيونى دول اشيلهم
ااااه يا قلبى اااااه منهم وااااه من غدر قلوبهم
اللى كنت مشتريهم بالرخيص هدرولى دمى
اللى منى مدوخينى واللى منهم غصب عنى
شيلت فى القلب وصاينهم والكبير فيهم طعنى
ااااه يا قلبى اااااه منهم وااااه من غدر قلوبهم

بقلم محمد البلاط

كلام الحب اصبح كذب - بقلم محمد البلاط

يا قلبى انسى اوهامك يا عقلى امسك الدفة

وبيع يا قلبى من باعك وعود للدرب واستكفى

كلام الحب اصبح كذب وناس فى ناس بتتشفى

طريق مجهول وضاعت فيه كرامة ناس والعفه

ومين للحب ده يوفى وفيه ما فيه ومستكفى

كلام الحب اصبح كذب وناس فى ناس بتتشفى

خلاص يا قلبى ده باعك وزادت بيك اوجاعك

بداية الرحلة كانت شوك واخرها بايده باعك

زمن الحب ولاه وراح و فى الباقى الام وجراح

وما تفكرشى العشره مع الخاين فيها افراح

يا قلبى انسى اوهامك يا عقلى امسك الدفة

وبيع يا قلبى من باعك وعود للدرب واستكفى

كلام الحب اصبح كذب وناس فى ناس بتتشفى

بقلم محمد البلاط

ميهمنيش العسكرى - بقلم محمد البلاط

ميهمنيش العسكرى
لانه طرى
وقابل يكون بياع خضار
وفيه اللى شغال كمسرى
ومهمهوش يكون حمار
انا كل اللى حرنى
وحرقلى دمى وجننى
قفرولى ليه ينصاب بعار
على فجلة اسمه العسكرى
راح يكسب ايه منفذ لبيع
علشان يديره اثنين عقيد
ومكسب ايه اللى سريع
يقدر يجيب راتب يفيد
ولا الحكاية احتقار
لليل اسود والنهار
ومحكوم علينا نام فى جحر
ويشرب نهارنا المرار
ده اسمه ايه غير انه عهر
وكأن بينا وبيه تار
يهين كرامة عزمنا
ويقل منا يذلنا
ويبقى وطنا اللى لينا
تحت الحصار
انا كل اللى حرنى
وحرقلى دمى وجننى
قفرولى ليه ينصاب بعار
على فجلة اسمه العسكرى
ميهمنيش العسكرى

بقلم محمد البلاط