ياما اشتكيتلك من الهوى - بقلم محمد البلاط

( ياما اشتكيتلك من الهوى )
==============
ياما اشتكيتلك من الهوى ياما اشتكيتلك
والروح بتصرخ والدوا مسكه فى يدك

عرفاك شرينى وبالغلا و جوه قلبك
لكن يفيد اه الغلا وانا دايقة بعدك
الشوق بيحرق مهجتى ودقات قلبى
محتاره تايهة فى دنيتى ومش قادره اخبى
تحت رحاية بيتعصر قلبى معيا
ما تقولى ايه اللى حصل نساك هوايا
بنده عليك ويرد ليا الصدى
واوهم فى نفسى بكره هيلبى الندا
عشمانة ليلة تفكرك بقمرها اللى سهرك
عشمانة فى نجوم السما على طريقنا يديرك
عرفاك شرينى وبالغلا وجوه قلبك
لكن يفيد اه الغلا وانا دايقة بعدك
ياما اشتكيتلك من الهوى ياما اشتكيتلك
والروح بتصرخ والدوا مسكه فى يدك
بقلم محمد البلاط

كفاية الحزن فى قلبى - بقلم محمد البلاط

لا دمع العين راح يجيبك ولا نوحى راح يعيدك
كفاية الحزن فى قلبى يفكرنى بمواعيدك
وبتألم من الفرقة وجرح فى قلبى من ايدك
عملت ايه عشان تهجر وتقسى عليا بعينادك

وبكتم حرقة جويا وخايفه للعزول يعلم
يزيده الفرح بقسيا وبشكوكه ليا يظلم
ظلمت بهجر احبابك واحبابك لك انصاعو
قفلت فى وشهم بابك وضعت وهم معك ضاعو
مفكرتش تعاتبهم ولا حتى تحاسبهم
لكن فكرت تجرحهم وتذبحهم وتهجرهم
لا دمع العين راح يجيبك ولا نوحى راح يعيدك
كفاية الحزن فى قلبى يفكرنى بمواعيدك
واعيد الماضى واتذكر كلام سمعته اتكرر
فى الماضى كان السكر وجالو يوم ومرر
ظلمت بهجر احبابك واحبابك لك انصاعو
قفلت فى وشهم بابك وضعت وهم معك ضاعو
بقلم محمد البلاط

فين العشاق يا ليل فينهم - بقلم محمد البلاط

( فين العشاق يا ليل فينهم )
==============
فين العشاق يا ليل فينهم وليه الحب هجرهم
قلوبهم قاسية ونسيوك ونسيو كل ايامهم
لا للعشرة كان التقدير ولا التفكير فى اشواقهم
صبحت بخيل يا ليل ولاه نسيو فى الظلمة احلامهم

فين العشاق يا ليل فينهم وليه الحب هجرهم
سألت نجومك وقمرك على خلى اللى تاه منى
لا عاد عرفك ولا سهرك عليه لقيته بيعينى
وذاد جفاه وبعاده وقسوة قلبه وعيناده
وكنت يا ليل ليه ذاده نهار يروح تيجى يعود
فين العشاق يا ليل فينهم وليه الحب هجرهم
فين العشاق يا ليل فينهم بعوك ولاه انت بايعهم
قلوبهم قاسية ونسيوك يا ليل ولاه انت نسيتهم
شطوط البحر كات حية بموج من شوق وحنية
وكنت يا ليل ليهم غية قسو ونسيوك
ونسيو الليل والماضى محدش ليه بقى فاضى
وصبح العشق ده عادى راحو ونسيوك
فين العشاق يا ليل فينهم نسيوك يا ليل ولاه انت نسيتهم
بقلم محمد البلاط

ماتلموش اهل الهوى ( غنائى ) بقلم محمد البلاط

ما تلموش اهل الهوى ولا تسألوش فين الألم
ده اللى من الحب انكوى رغم انه موجوع ليه عشم

ما تلموش على شكوته ما تلموش على دمعته
ده النار اللى كويته بعد الحبيب اللى ظلم
سهر الليالى فكره كان قلبه خالى ودور
فى اللى اسمه حب مرره واخرها مش لاقى دوا
ما تلموش اهل الهوى ولا تسألوش فين الألم
هنجيب منين ليه الدوا اصل دواه شىء فى العدم
ما تلموش على شكوته ما تلموش على دمعته
ياما ناس عرفت قصته واتمنو يبقو ليه خدم
ما تلموش اهل الهوى ولا تسألوش فين الألم
ده اللى من الحب انكوى رغم انه موجوع ليه عشم
رغم انه موجوع ليه عشم
بقلم محمد البلاط

انا تعبانه معدتش قادره - بقلم محمد البلاط

مش من الهم يا ولدى انا ببكى

ولا من ظلم الناس انا بشكى

انا من تعبى معدتش قادره

ومع الله بناغى وبحكى

وان كان دمعى سال على خدى

لاهو بقصدى ولا كان ودى

انا مع الله بناغى وبحكى

امتى ارتاح معدتش قادره

مش من الهم يا ولدى انا ببكى

ولا من ظلم الناس انا بشكى

ولو على الموت انا بستناه

بس يا ولدى فين هلقاه

راح الكل ما خدنى معاه

وانا فى الدنيا بقاسى بكدى

انا من تعبى معدتش قادره

وبستناه عليا يعدى

انا تعبانه معدتش قادره

ومع الله بناغى وبحكى

بقلم محمد البلاط

بلا نيله - بقلم محمد البلاط

كلام اليوم ملوش لزمة
ما كنا فى عز الأزمة
وكان الجبن فى قلوبنا
وكله شايل الجزمة
عرفنا الحق متأخر
ما كنا ساعتها بنبخر
وقولنا الذكر حيلة
وساعت الجد اتأخر
بلا نيلة بلا نيلة
كفاية وشيلوا الشيلة
ولسة الجاى فيه اثقل
وتطوى رقاب ذليلة
كلام اليوم ملوش لزمة
محمد البلاط

اااه يا انا - بقلم محمد البلاط

ااااه يا انا اااه يا انا
بين فكرى واااه الألم
محتار بصبرى فى دنيتى
لاعرفت يوم معنى الندم
ولا شوفت نور فى سكتى

راضى برغم اللى اتهدم
واللى بنيتو فى رحلتى
كان بالعزاب ويا الضنى
عشمان اشوف يوم الهنا
على فطرتى عايش انا
وبقسمتى راضى بالضنى
لكن ايام دنيتى
عاصية تنورسكتى
ااااه يا انا اااه يا انا
من فكر خدنا وضمنا
لا فهمنا ليه خدنا معاه
ولا على الطريق بيدلنا
ااااه يا انا اااه يا انا
بين فكرى واااه الألم
محتار بصبرى فى دنيتى
لاعرفت يوم معنى الندم
رغم ان تاهت سكتى
ااااه يا انا اااه يا انا
بقلم محمد البلاط