بعد ايه جاى تلومنى بعد ايه؟؟؟ - بقلم محمد البلاط

 - بعد ايه جاى تلومنى بعد ايه؟؟؟

بعد ما ضيعت عمرى بعد ظلمك لى وصبرى

بعد فتح باب لقبرى جاى تلومنى بعد ايه

بعد ايه جاى تلومنى بعد ايه؟؟؟

الوصال انت اللى قطعته والخصام انت ابتديته

حتى هجرى انت اللى فرضه وظلم قلبى انت رضيته

وجاى تلومنى وتعاتبنى ما انت قولت راح تسيبنى

وقطعت الود بينا واللى بينا كمان نسيته

بعد ما ضيعت عمرى بعد ظلمك لى وصبرى

بعد فتح باب لقبرى جاى تلومنى بعد ايه

بعد ايه جاى تلومنى بعد ايه؟؟؟

- بقلم محمد البلاط

مين هيقدر الاحساس - بقلم محمد البلاط

 - مين هيقدر الاحساس

ياللى عايش عمرك مهموم جاى تحب يا قلبى اليوم

بعد ما ضاع العمر وراح فى بحر العشق نويت تعوم

بعد ما قولت خلاص ارتاح جاى بتفتح تانى جراح

اهدى يا قلبى وراجع نفسك ايه غواك يا قلبى وجبرك

ترجع تانى لايام قهرك بعد ما قولت خلاص راح اصوم

هنسى العشق وانسى العوم وانسى الشىء اللى يجيب لوم

ليه بتجبرنا يلومنا الناس مين هيقدر الاحساس

بعد ما كنا التبر وماس ليه بتجبرنا يلومنا الناس

اهدى يا قلبى وراجع نفسك مين هيقدر الاحساس

مين هيقدر الاحساس

- بقلم محمد البلاط

بالحنان الدنيا تحلى - بقلم محمد البلاط

 - بالحنان الدنيا تحلى

بالحنان الدنيا تحلى

لو طريقك كله وحله

وفى عنيك هتشوف حياتك

فى اللى جاى افضل واحلى

بالحنان لو حتى لمسة

او نبظرة او بهمسة

او بكلمة معها بسمة

هدية ليا منك انتا

بتهديهالى لقلبى ورده

بالحنان تكسب ودادى

وقلبى منصاع وراضى

وعمرى كله املكولك

وبمزاجى وبمرادى

بالحنان الدنيا تحلى

لو طريقك كله وحله

وفى عنيك هتشوف حياتك

فى اللى جاى افضل واحلى

بالحنان الدنيا تحلى بالحنان الدنيا تحلى

- بقلم محمد البلاط

يا حزن - بقلم محمد البلاط

 

-                   يا حزن

يا حزن القلب ليه تفارق
                                  وبينا الود دا مكتوب

لا ليك ناهب ولا سارق
                                وعهدى معاك عهد ايوب

راح اتألم وانا صامت
                               لا هتكلم ولا اناهد

فى محرابك هعيش
                             زاهد ولو قالو ان انا المعيوب

هصلى واتوب        وتبقالى ثوب            يدارينى

وعلى المكتوب تكفيه يا دوب
                                     دموع عينى

ولو قلولى هتودع
                               تغيبلك فترة وترجع

مش هصدق ولا هسمع
                              تسيبنى لمين يعزينى

يا حزن القلب ليه تفارق
                                 وبينا الود دا مكتوب

لا ليك ناهب ولا سارق
                                وعهدى معاك عهد ايوب

             وعهدى معاك عهد ايوب

-              محمد البلاط

كش ملك - بقلم محمد البلاط

 

كش ملك

كش ملك ضاع الوزير

مش باقى غير الزنبلك

والفيل راح والعسكرى

ليك عندى وجبة جنبرى

يا تكون حريف بالقوى

وفى اللعب تبقى فهلوى

يا تاخد حصانك الجريح

على قهوة تقعد تستوى

وكش ملك ضاع الوزير

مش باقى غير الزنبلك

بقلم محمد البلاط

لجسر الود بمده - بقلم محمد البلاط

 - لجسر الود بمده

رموش عنيه

يا ناس قاتلين واروح لفين هروب منه

وانا العاشق

وانا المسكين وليا رمشه بيسنه

بحاول ليا اشده وخايف قلبى ليهده

وانا من الشوق لجسر الود بمده

وانا خايف

رموش عنيه

يا ناس قاتلين واروح لفين هروب منه

وانا العاشق

وانا المسكين وليا رمشه بيسنه

بحبه

وخوفى من قربه وبتمناه وبحاربه

عين فى جنة

وعين فى نار وبينا تار لكن قابله

وبحاول ليا اشده وخايف قلبى ليهده

وانا من الشوق لجسر الود بمده

وانا خايف

رموش عنيه

يا ناس قاتلين واروح لفين هروب منه

وانا العاشق

وانا المسكين وليا رمشه بيسنه

وليا رمشه بيسنه

- بقلم محمد البلاط

ربى لا تجعل لينا حسود - بقلم محمد البلاط

 - ربى لا تجعل لينا حسود

قالوا علينا قد ما قالوا

واحنا سمحنا وقولنا ومالو

يمكن منهم دى تكون غيرة

او ملهمش فى الهوا حيلة

او فى الحب اتكسر القلب

وكانت شيلة الهم ثقيلة

قالوا علينا قد ما قالوا

واحنا سمحنا وقولنا ومالو

ربى لا تجعل لينا حسود

ولو موجود العود فى عنيه

اللى حداه فرخة بتبيض

ليه الناس بتبص عليه

واللى حداه مزرعة او غيط

بعين عفريت وبخور يرقوه

قالوا علينا قد ما قالوا

واحنا سمحنا وقولنا ومالو

دا اللى حيلتنا شوية حب

ولين وحنان وبندعى الرب

وحق الناس عندنا يتصان

ومنعرفش ابدا كذب

وستر من الله وبفضل الله

لين لينا القاسى والصعب

قالوا علينا قد ما قالوا

واحنا سمحنا وقولنا ومالو

ربى لا تجعل لينا حسود

ولو موجود العود فى عنيه

اللى حداه فرخة بتبيض

ليه الناس بتبص عليه

ليه الناس بتبص عليه

- بقلم محمد البلاط

شهادة مكتوبة فى ورق - بقلم محمد البلاط

 - شهادة مكتوبه فى ورق

ايام عمر بتتسرق بشهادة مكتوبه فى ورق

مكتوبه بمداد النفاق وفى لحظة ممكن تتحرق

وانا مش لازمنى تعترف او تنكر انى بتقرف

من اللى يبيع الضمير وكرامته ضايعه والشرف

برواز لصورة وتاج ماس ومدلية فضىة وكاس نحاس

ودنيا فردالك زراع بس البتاع ملوش اساس

هتفيد بايه فى اخرتك يا اللى انت بايع ذمتك

وسرقت حق ملكش فيه حتى مقاس جزمتك

هيفيد بايه مكتب عليه صورة لعلم

وانتا الى بيه ومعتبرنا الخدم

وان جاك مسكين بطلب امله بكلمة يتهدم

هيفيد بايه صورة لبيه ووراه رمز للهرم

وسواد القلب مليه وضمير بالرشوة اتخرم

وانا مش لازمنى تعترف او تنكر انى بتقرف

من اللى بيبيع الضمير وكرامته ضايعه والشرف

بشهادة مكتوبه فى ورق وفى لحظة ممكن تتحرق

وايام عمر بتتسرق بشهادة مكتوبه فى ورق

بقلم محمد البلاط

ست الكل يا ست الكل -- بقلم محمد البلاط

 ست الكل يا سيت الكل

ليلتك فل وعال العال
خفى دلالك حبة علينا
قلب الكل فى حبك مال
مش ناوين على فتح المذبح
والمشرحة مفيهاش عمال
مين لمين هيقوم ويذبح
لافى سكينة ولا منشار
خفى دلالك حبة علينا
خلى الليلة تعدى بخير
قبل ما يشمت الناس فينا
بكسر القولة ورانا وزير
ست الكل يا ست الكل
لسه الحبل معاكى طويل

المعزيم قاعدين بتطل
على كوشة لمة القمرين
واللى نقصنا بس يبوسنا
كل الناس ويقولو شاكرين
كل الناس ويقولو شاكرين

- بقلم محمد البلاط 

بلاش يا عمرى تتصدم - بقلم محمد البلاط

 - بلاش يا عمرى تتصدم

مش بالوداع راح ينتهى كل اللى بينا ويتهدم
ولا عمر قصة حبنا هتروح مع الريح للعدم
مين فينا بالتانى غدر علشان يشيل كل التهم
وان كان فراقنا دا قدر بلاش يا عمرى تتصدم
مش بالوداع راح ينتهى كل اللى بينا ويتهدم

ان عشنا وطال عمرنا يمكن نصيبنا نلتقى
وبيه نجدد حبنا والروح تسمو وترتقى
وان عز بينا اللقى يكفينا انه اللى بقى
فى قلوبنا ذكرى فى شرنقة
وبلاش يا عمرى تتصدم
مش بالوداع راح ينتهى كل اللى بينا ويتهدم
ولا عمر قصة حبنا هتروح مع الريح للعدم
بلاش يا عمرى تتصدم بلاش يا عمرى تتصدم

- بقلم محمد البلاط

توبه من بعدالنوبا - بقلم محمد البلاط

 - توبة من بعد النوبا

توبة من بعد النوبا وتوبة

عمرى ما اصدق تانى كلامك

واللى هاأمن بيه من قولك

بس الهجر وبس خصامك

اتعودت اسمع وافوت

ياللى الكذب عليك اتعود

لا بيفارقك ولا بتفارقه

ولا فكرت فى يوم تتردد

يبقى ازاى عايزنى اصدق

ان الصدق عندك مبداء

ولسه معادك كان ويايا

وقولت خلاص بالود هنبداء

فين الود وفين ودادك

وانت نسيته وقافل بابك

ولسه عايزنى اصدق منك

اى كلام تقولو جنابك

توبة من بعد النوبا وتوبة

عمرى ما اصدق تانى كلامك

واللى هاأمن بيه من قولك

بس الهجر وبس خصامك

- بقلم محمد البلاط

نسينى ليه - بقلم محمد البلاط

 

- نسينى ليه

نسينى ليه ؟؟؟

وسيبنى ليه ؟؟؟

والقلب معصور من الالم

كان زنبى ايه ؟؟؟

وعملت ايه ؟؟؟

ولا انت منى بتنتقم

الهجر مش هو الطريق

ولا سبيل للنعم

مين عاش من غير رفيق

من غير قصره ما يتهدم

نسينى ليه ؟؟؟

وسيبنى ليه ؟؟؟

والقلب معصور من الالم

كان العتاب

بيه فتح باب

والود يبقى ما يتعدم

لكن اعمل ايه ؟؟؟

فى اللى نسى

وعلى قلب من حبه قسى

وبدادى فيه

لاجل اراضيه

لكنه صمم وعصى

الهجر مش هو الطريق

ولا سبيل للنعم

كان زنبى ايه ؟؟؟

وعملت ايه ؟؟؟

ولا انت منى بتنتقم

ولا انت منى بتنتقم

نسينى ليه؟؟؟؟؟

نسينى ليه؟؟؟؟؟

- بقلم محمد البلاط