من مين يا باشا بتحمى مين - بقلم محمد البلاط

من مين يا باشا بتحمى مين
دا اللى عملكم مرشدين وفى بلطجية بتتحمو
وفى العراك اتخن تخين وكبيركم عنها بتتعمو
خلى الجراب مقفول بطين وبلاش تانى تتكلمو
بالحرب هددكم عويل وعملتو طرش مفيش سمع
وراح لعندهم الكبير وقعد زليل بيستمع
وانت اللى جاى على الحريم تعمل عليهم الجدع
خليها تمسك السلاح وانتا امسك السلاح
ونفتح مجال ليكم براح وشوف مين هيتردع
مش جدعنة البلطجة والفشخرة والبهرجة
دا انتا يوماتى بتتلدع وحريمنا هو الجدع
يا كلب حارس الودع واهلك وكلهم الوجع
من مين يا باشا بتحمى مين والنيل عنكم اتقفل
سادد ودانك ليه بطين وبقيت محتاج لكفل
لبسك وكلك مننا واللقمة من عرق الجبين
وقولنا انك دمنا ويمكن تكون فى يوم امين
على ارضنا على حقنا دوست علينا سرقتنا
وطاوعت شيطان رجيم
ونسيت اهل حتتك واسرة كريمة ربتك
حتى اللى كات بتهننك منجتش من مكر الغشيم
من مين بتحمى يا باشا مين
محمد البلاط

افتكر يوم راح يجيلك - بقلم محمد البلاط

افتكر يوم راح يجيلك
-------------------

قولى يا ابنى زنبى ايه وليه بتقسى عليا ليه
كنت تطلب قرش منى كنت بعطيك الجنيه
بيك فرحت لما جتنى وقولت الله بيك سندنى
وجوه عينى كنت نن ليه النهاردة جاى تفوتنى
قولى فكرنى شاورلى على اللى بدر ليك منى
كنت بحزن على حزنك ولو بتبكى ليك بغنى
وكنت احب اللى يحبك وبحس بأنه منى
والنهاردة بسوء منك وبكلام جارح تهنى
قولى يا ابنى زنبى ايه وليه بتقسى عليا ليه
كنت تطلب قرش منى كنت بعطيك الجنيه
قولى يا ابنى زنبى ايه قولى يا ابنى زنبى ايه
على الصلاة والصوم بدلك والحلال اكلك وشربك
والحرام بعدته عنك قولى ايه غيرك ايه
كنت تطلب قرش منى كنت بعطيك الجنيه
وافتكر يوم راح يجيلك فيه يترد جميلك
من اللى فاكره ضى عينك واللى ربته بايدك
وافتكر زرعت ايدك الحصاد هيكون ليك
اما ورد اااه يفيدك واما سنط وكله شوك
وانا سيبك بقى منى حبه ابكى وحبة اغنى
وشكوتى للى خلقنى هو اللى راح يعينى
بس هوصيك وصية اوعى يوم تبكى عليا
اللى ما اهتم بحياتى دمعه يعمل ايه ليا
وافتكر يوم راح يجيلك فيه يترد جميلك
من اللى فاكره ضى عينك واللى ربته بايدك
وساعتها افتكرنى وابقى اترحم عليا
وابقى اترحم عليا

بقلم محمد البلاط